Síðan hennar Siggu

draumur

Fri, 16 Feb 2007 13:37:56 GMT

Í nótt dreymdi mig draum. Ég, Heiðrún og Helga vorum í kokkteilboði í voðalega fínum kokteilkjólum með svona háa hanska og uppsett hár og allt. Það var fullt af fólki þarna sem ég greindi ekki andlitin á og einhver þjónustustúlka kom með rauðvín handa okkur. Glasið hennar Helgu var hins vegar alveg tómt, Heiðrún sullaði sínu rauðvíni yfir kjólinn sinn og mitt glas var með svo mörgum sprungum að ég þorði ekki að drekka úr því af ótta við að það splundraðist. Við vorum ekki par ánægðar.

Ég held að þetta sé eitthvað táknrænt.

tannálfurinn

Fri, 02 Feb 2007 21:56:54 GMT

Mér líður eins og greindarvísitala mín hafi lækkað allverulega eftir að ég horfði á Kirstie Alley í bleikum kjól fljúga um í tugi mínútna. Myndin hét The tooth Fairy.

Ég þarf endilega að hækka mig aftur upp í 152 (skv. IQ netprófi) með því að fá mér fixið mitt af Supernatural/Heroes.

Annars held ég að ég sé að fullorðnast. AFTUR afþakkaði ég partý með fríum bjór því mér fannst meira heillandi að sitja fyrir framan tölvuna/horfa á heilaskemmandi kvikmyndir á RÚV/fá magapínu af lakkrís heldur en að verða hífuð og skemmta mér með vinum og kunningjum.Hver veit hvern ég hefði hitt á förnum vegi hehehehehehehehe....

Heiðrún er farin að verða minn rival í draumamálum. Ég þarf endilega að koma með einn djúsí á morgun.

yfirgefin

Thu, 01 Feb 2007 14:10:37 GMT

Mér finnst ég vera óttalega yfirgefin þessa stundina. Ein og einmana á The National Library of Iceland. Enginn hefur áhuga á félagsskap mínum nema Stjórnskipunarrétturinn.

Vinkona mín Stella Vestmann fulltrúi laganema hringdi (aftur, ég er lúser) og nú er ég komin með líf mitt á glimrandi hreint með hennar góðu hjálp. Ég tek sumarpróf í ágúst og get því tekið Almennuna í nefið í apríl. Kannski að ég taki samt heimspekina líka.

Það þýðir að ég get unnið á Vífó (nenni ekki að skipta um vinnu og mér líkar starfið vel) eins og vitlaus í allt sumar. Tek kannski næturvaktir og les á nóttunni. Úh, skemmtilegt sumar. Nei annars, ég er alveg ákveðin í lögfræðinni. Þetta er eitthvað sem ég vil gera og mun.

Í nótt dreymdi mig Ragga Bjarna, Björgvin Halldórsson, Siggu Beinteins og Bubba. Ég var eitthvað að kynna þau fyrir einhverjum útlenskum erfðafræðingum. ,,Yes, here you can see our best Icelandic singers, they definitely have the secret gene for a beautiful voice..." sagði ég í væmnum tón og þau brostu bara en erfðafræðingarnir yggldu sig.

Mig dreymir Bubba oft. Kannski að hann ásæki undirmeðvitund mína án þess að ég viti það.

SKÓR

Wed, 31 Jan 2007 00:28:37 GMT

Mér er ekki vel við verslanir en so help me god....ég held ég verði að fara að versla eftir að hafa séð þetta hér: http://youtube.com/watch?v=tYnn51C3X_w

Ég hef sjaldan séð neitt jafn steikt. Samt svo undarlega heillandi. milljónir hafa séð þetta og rúmlega 48 þúsund hafa þetta í favourites. Ég dýrka youtube. Ég get hangið þar tímunum saman ef ég hefði samviskuna í það.

Kannski að sumir sem ég þekki muni sjá sjálfa sig í gellunni í myndbandinu (ef við lítum framhjá því að það er sennilega karlmaður með kollu).

Sugar Rush er búið. En þriðja serían er á leiðinni! Íííííííííí fyrir því!

Sykur

Sun, 28 Jan 2007 23:29:44 GMT

Mér er svo illt í maganum....held það sé eitthvað tengst SykurSjokk....(e.Sugar Rush). Maður þarf að neyta sykurs meððí.

Guð, ég nenni ekki að skrifa neitt. Ætla bara að fara að sofa.

Jú eitt. Ég sofnaði í um það bil fimm mínútur einhver tímann í dag, sitjandi við borðið. ÞEssar fimm mínútur dreymdi mig alveg svakalega martröð sem var rosalega löng. Ofsalega skrítið. Ég vaknaði áður en gólfið inni á einhverju klósetti sogaði mig niður (það var lifandi), sem betur fer. Skrítinn draumur. Ekkert tengdur skilnaði að borði og sæng sem á hug minn allan þessa dagana.

jessörína

Fri, 26 Jan 2007 13:10:52 GMT

Ástkær stórilitli bróðir minn, Kjartan, er fimmtán ára í dag. Til hamingju með það!!!! Ég man sko þegar ég var fimmtán, hehehehehe :haha: :^)

Annars er ég gífurlega ánægð með lyktir Baugsmálsins. Fáránlegt að eyða peningum skattborgaranna í þessa vitleysu.

Af hverju er gaurinn við hliðina á mér farinn að ræða við mig um prentarafítusa? Mér líður eins og ég sé álíka klár og þegar ég reyndi að hjálpa mömmu að tengja nýja þurrkarann(jibbí!). Guð minn almáttugur. Hann er farinn að ræða um námið! Sjitt, og núna hvort ég ætli á djammið! Hvað á ég að gera!!!!

Kurteis, hnyttin og fjarlæg. Kurteis hnyttin og fjarlæg.....

Ég ætlaði að skrifa meira um Baugsmálið en núna er ég komin úr stuði.

Annars er ég ef til vill að fara jammin' í kveld. Eitthvað er óljóst hvernig kvöldmatnum verður háttað. Ég stóð í þeirri saklausu trú að öll fjölskyldan færi út að borða og skráði mig því ekki í kokteil (vísindaferð en þar sem laganemum er illa við aðrar deildir Háskólans köllum við þetta kokteila) hjá SAMFYLKINGUNNI *hrollur*. En hei frír bjór. En svo kom uppúr dúrnum að mér og Einari er bara ekkert boðið með svo ég sennilega borða KFC yfir sjónvarpinu með Einari (vorkennið okkur) í staðinn fyrir að verða blekuð með kærum fyllubyttusamnemendum. Sem er kannski ekki svo slæmt með tilliti til ömurlegrar lausafjárstöðu.

Núna er ég komin í óskiljanlegar samræður við piltinn um flokkspólitík. Af hverju kem ég mér í svona vitleysu? Af hverju get ég ekki verið eðlilegt ungmenni sem veit ekkert um þess háttar? Ég sem er ekki einu sinni flokksbundin en mun örugglega kjósa Vinstri Græna (Ekki berja mig Sigrún) því mér er illa við alla aðra flokka. Sérstaklega Samfylkinguna og Frjálslynda og Sjálfstæðisflokkinn. Minnir reyndar að ég hafi kosið Framsókn eða eitthvað álíka í bæjarstjórnarkosningunum bara af því hinn kosturinn var Sjálfstæðisflokkurinn o´g ég er komin með nóg af honum. Verst að Sjálfstæðisflokkurinn er sennilega kominn til að vera í Garðabæ því 80% íbúa eru kapítalistahelv....

OK, ég róa mig. Ég er eðlileg umburðarlynd manneskja með innri ró. Innri ró. Aaaaaaahhhhhhh......

Kannski að ég verði rosalega bóhem þegar ég flyt í Stúdentagarðana/101. Geng um í lopafatnaði og býð gestum og gangandi í kaffi og kleinur og umræður um pólitík. Perlufestar í staðinn fyrir hurðir o.s.frv.

jahérnahér

Wed, 24 Jan 2007 23:18:17 GMT

Ég er búin að komast að því af hverju mér finnst mitt líf svona einstaklega óáhugavert og tilbreytingarsnautt. Ég gjörsamlega dýrka þættina Supernatural, Heroes og jafnvel Ghost Whisperer (reyndar eru þeir frekar leiðinlegir...) og líf mitt er að sjálfsögðu fremur rólegt miðað við þau ósköp. Engin skrímsli, draugar, skuggalegir menn frá dullarfullri stofnun á eftir mér. Ekki einu sinni myndarlegir draugabanar (hahahaha).

Sjónvarpsþættir hafa brenglað veruleikaskyn mitt og núna verð ég að koma því í samt lag með því að virkja sjálfa mig. Ganga upp á Esjuna eða fara í sunnudagsbíltúr um Hvalfjörðinn. Breyta mataræðinu til betri vegar og jafnvel hætta að drekka kaffi.

Eða kannski bara hugsa meira jákvætt ;) Ég er viss um að það er fullt af fólki sem lifir tilbreytingarlausara lífi en ég. Þetta er a.m.k. ekki jafn slæmt og síðasta önnin mín í FG þar sem ég á tímabili var viss um að endalok lífs míns nálguðust ört sökum leiðinda.

Þið vitið að ég var að grínast með þetta með að virkja sjálfa mig. Hljómar það eins og eitthvað sem ég segi? NEI. Ég mun í mesta lagi fara í smá megrun og skreppa í sund.

Annars var ég að uppgvötva alveg frábært tyggjó frá Stimorol. Svona er lýsingin: vanilla goes mint goes FUSION.....og er bara líka svona skrambi gott.

Eruð þið búin að taka eftir því að ég er ekkert búin að minnast á l*gfræði?

Ég dó næstum því úr leiðindum í morgun þegar einhver virðulegur héraðsdómari sem ég man ekkert hvað heitir sýndi okkur í Excel-forriti hvernig kjördæmisskipan landsins úthlutar jafnaðarsætum eða eitthvað álíka. Eins og ég hélt að þetta yrði skemmtilegur tími þar sem ég hef virkilegan áhuga á stjórnmálum og Alþingi og kosningum.

Ég ætla að fara að lúlla. Kommentið endilega ástarpungarnir mínir.

upp á við

Mon, 22 Jan 2007 15:37:19 GMT

Ég hef það á tilfinningunni að héðan í frá liggi líf mitt upp á við. Allt hefur verið í lægð síðan í september en þetta er búið að vera svo andskoti góður dagur að ég er ekki að komast yfir það.

Fékk þennan líka frábæra 8 tíma svefn í nótt og tókst að mæta fersk og fín í skólann. Mikil framför frá síðustu viku þar sem ég var góð ef ég náði 3 tíma svefni. Ekki það að ég hafi verið hangandi á MSN eða soleis heldur lá ég alltaf bara andvaka frá miðnætti. Áhyggjur af framtíðinni og þess háttar.

Ég er líka ekkert smá að fíla Heimspekileg forspjallsvísindi. Geðveikt gaman og frábærlega skemmtilegur kennari. Ég grenjaði úr hlátri yfir alþingismannabröndurunum hans (núna detta H&H niður dauðar). Datt alveg inn í Síðustu Dagar Sókratesar eftir Platón góðvin minn. Held að ég sé á góðri hillu núna því mér finnst líka gaman í Fjölskylduréttinum og Stjórnskipun. Fékk líka einmitt skemmtilegt sms frá Gullu elskunni minni.

Í hádeginu át ég með Önnu og Sigrúnu (sitthvor góðvinkonan) á Grillhúsinu. Anna var þar að framkvæma skuldajöfnuð síðan í nóvember sem ég var að sjálfsögðu búin að steingleyma :^) Ji minn hvað það var gott.

Í gærkvöldi átti ég líka góða stund með bræðrum mínum, eins furðulegt og það hljómar. Ég held að við séum alveg sérstaklega góð systkini, sama hvað mamma og pabbi segja. Við eigum bara í sambandi sem enginn, og þá meina ég enginn, utanaðkomandi skilur :haha: Það er bara virkilegur einkahúmor alltaf í gangi hjá okkur.

Núna ætla ég að lesa í nokkra klukkutíma í Frelsinu eftir John Stuart Mill. Það var sko kall að mínu skapi. Mjög framúrstefnulegur í álitum sínum á jafnrétti og mannlegri hugsun.

Eitt reyndar hrikalegt sem gerðist í gær. Þurrkarinn er bilaður og ég neyddist til að HENGJA UPP ÞVOTT sem ég hef ekki áður gert. Setti meira að segja rúmföt í þurrkarann móður minni til mikillar armæðu. Það var samt allt í lagi með þau.

Lítil og hversdagsleg saga úr gráum raunveruleikanum

Thu, 18 Jan 2007 23:28:06 GMT

Ég byrjaði daginn hress og kát eftir þriggja tíma svefn. Ég var svo þreytt að ég táraðist. Var hrikalega sloj í annars mjög áhugaverðum tíma hjá Brynhildi Flóvenz (hvað er eiginlega með þessa lögfræðinga og ÆTTARNÖFN? Er ég eitthvað verri manneskja þótt ég sé ,,bara" Dóttir?).

Klukkan hálf ellefu rölti ég á Hressó með Sigrúnu í skítakulda. Kuldinn vakti mig svo sannarlega og það gerði kaffibollinn líka. Kíktum á einkunnirnar og komumst að því að 80% nemenda féllu í Almennunni, þar á meðal ég og allir sem ég þekki.

Í nokkur augnablik fannst mér líf mitt hrynja til grunna. Svo jafnaði ég mig. Þetta kemur allt saman. Ef ég næ þessu ekki í apríl ætla ég bara að drífa í því að finna sjálfa mig, hvað sem það nú þýðir. Leit á björtu hliðarnar. A.m.k. hafði ég ekki þennan dag séð bregða fyrir tveimur mannverum afar neðarlega á vinsældarlista mínum, sem ég yfirleitt sé á hverjum degi eða í hvert sinn sem ég bregð mér á bæi. Það hlaut að boða eitthvað gott.

Átti í innhaldslausu blaðri við nokkrar manneskjur. Borðaði seigt lambalæri hér heima. Komst að því að það gæti verið svolítið gaman að fara til Tælands eða Indlands. Mundi svo eftir hitasvækju, moskítóbitum, mannræningjum o.s.frv. Ætli það sé hægt að ferðast þar um í brynvarinni, loftkældri rútu?

Afþakkaði pent boð um að koma á fyllerí uppi í Alþjóðahúsi. Mér fannst mun meira aðlaðandi tilhugsun að sitja fyrir framan tölvuna í náttfötunum en að drekka bjór og æla. Kannski að það gefi mér einhver stig í fullorðinsleiknum? Eða kannski leiðindaleiknum?

Bráðlega ætla ég að skríða uppí rúm með spennusöguna Skipið. Ég hef á tilfinningunni að eitthvað dramatískt sé í uppsiglingu þar og aðalbersónunni verði gefinn byr undir báða vængi.

Vó hvað ég get verið óendanlega fyndin, snjöll og orðheppin.

Og svo smávegis sem ég verð að deila með öllum:

Ég sit í Sifjarétti og er gjörsamlega að deyja úr þreytu. Ég sé rúmið mitt í hyllingum, hlý sængin, mjúkur koddinn, ilmandi lakið. Veðurhamurinn lemur gluggann en ég þarf aldrei nokkurn tímann að fara framúr.....

Lít í kringum mig svo lítið ver á og sýnist á vansældarsvip, tómlegum blóðhlaupnum augum og einstaka svefnpurkum að samnemendur mínir eru í svipuðum hugleiðingum. Prófessorinn tekur eftir því líka og hún setur upp ógurlegan armæðusvip áður en hún gerir hlé á ræðu sinni um opinber skipti búa.

Prófessor: Jaaaaaaa, hérna. Voðaleg syfja er yfir hópnum í dag.

Samnemandi: Já, þetta er nú einu sinni Sifjaréttur.

Ég þarf ekki að taka það fram að ég fór í hláturskast og restinni af tímanum var borgið. Guði sé lof og dýrð fyrir júrískan aulahúmor.

húsmóðir

Sun, 14 Jan 2007 15:47:56 GMT

Ég held ég verði aldrei góð húsmóðir.

Áðan var ég að þrífa stóra baðherbergið hátt og lágt með dyggri hjálp afmælisbarnsins og örverpisisns Einars bróður. Baðherbergið er skínandi hreint.

Hins vegar notuðum við svo mikið af hreinsiefnum að okkur varð flökurt, og enginn getur farið þarna inn án þess að fá höfuðverk. Mamma reyndi að redda þessu með viftu og Chanel No. 5 en það studdi lítið. Því miður er herbergið mitt beint á móti baðherberginu og ég er ekki frá því að eiturgufurnar séu að skipuleggja innrás.

Þar fór það. Við vissum alltaf að ég get ekki skúrað, þvegið þvott eða eldað, en núna vitum við líka að ég get ekki meðhöndlað hreinsiefni. Það eina sem ég get skammlaust í húsverkum er að vaska upp og raða í uppþvottavél, og búa um rúm. Takk fyrir það, Vífó.

Húrra

Sun, 14 Jan 2007 01:58:22 GMT

Já, húrra fyrir stelpunni sem las allt um lögskilnaði hjóna á laugardegi í staðinn fyrir að liggja uppí rúmi og hugsa um eigin vesaldóm eins og annað venjulegt fólk í tilvistarkreppu.

Fékk sykursjokk áðan og er aðeins að trappast niður núna. Sofna samt ekki nærri því strax og er því að spá í að glápa á byrjunina á X-Men 3. Bara svona til að dreifa huganum ;)

Ég var að spá í verkefnum vetrarins.

1) Vera geggjað dugleg í skólanum.

2) En um leið duglegri að hitta vinkonur mínar

3) Hætta að fá tilvistarkreppuköst með tilheyrandi sjálfsblekkingum og öndunarörðugleikum.

4) Hætta að ræða um leiðinlega hluti og fara í vont skap. (s.s. ég má ræða um leiðinlega hluti enda geri ég það oft en ég ætla að hætta að fara í fýlu uppúr því).

5) Koma mér í form. Ekki beint grennast kannski neitt mikið, heldur verða svona stæltari og sterkari.

6) Hætta að mæta útlítandi eins og ósofinn spíttari í skólann. Ég er ósofin en þarf ekki að líta út fyrir það líka.

7) Kannski að ég pikki líka niður Interrail-endurminningar, í alvöru formi. Svona eins og skáldsaga sem ég mun ekki gefa út.

8) Þið vitið að þessi listi er frekar hæpinn.

Á morgun (eða í dag) á Einar bróðir afmæli. Orðinn táningur þessi gutti. Mun því heimilið mitt fagra liggja undir innrás félaga hans og ég hef íhugað að flýja. Ég er því búin að ákveða að hitta H&H (sama hve Dóra og Bungorn hafa gert Helgu þunna) og fara með þeim að gera eitthvað skemmtilegt LAAAAAAAAAAANGT frá innrásinni.

Guð minn góður. Var að fatta eitt hryllilegt. Kannski vill móðir mín kær moral support frá mér? Hvað tek ég þá til bragðs?

Líf óskast!

Thu, 11 Jan 2007 11:42:25 GMT

Ég á mér ekkert líf!! Svona eru mínir dagar:

06:45: vakna ógeðslega drulluþreytt og snúsa.

07:00: drattast á fætur. Pirrast yfir fataskorti, púðurskorti og matarskorti. (ÞAÐ ER EKKI FULLT HÚS AF MAT ÞEGAR AÐALUPPISTAÐAN Í ÍSSKÁPNUM ERU ÚTRUNNAR PULSUR OG STEIKTUR LAUKUR!)

07:30: Legg af stað með pabba. Frábært að sitja hundþreytt í Vollanum, upphituð sæti og alles, en hræðilegt að stíga út úr honum í þessum sadistakulda.

08:00-14:00: sit í Háskólabíó og gef virðulegum dósentum, prófessorum og aðjúnktum (það virðast engir KENNARAR eins og við þekkjum þá í HÍ) mína óskiptu athygli, með dyggri hjálp kaffivélarinnar. Í millitíðinni fæ ég koffínsjokk, heyri kjaftasögur og fæ asnaleg sms frá flass.is.

Fram að kvöldmat hangi ég svo yfirleitt með ýmsum vinkonum yfir námsbókum. Heyri endalaust margar kjaftasögur og segi jafnmargar sjálf og ræðum líka hin ýmsu lögfræðilegu álitaefni (ég veit......).

Fer heim og borða kvöldmat. Í gær fékk ég grillaðan lax og steiktarkartöflur í jógúrtsósu. Namm.

Svo læri ég meira. Kjafta kannski í millitíðinni við Heiðrúnu, Helgu eða Sigrúnu í síma eða MSN. Um ellefuleytið kíki ég á eitthvað skemmtiefni í tölvunni. Svo geri ég heiðarlega tilraun til að fara að sofa en er með svo miklar áhyggjur af komandi mánuðum og öllu því veseni og panikki sem mun fylgja þeim að ég sofna ekki fyrr en seint og síðar meir.

Kannski að ég peppi upp á líf mitt. Redda mér Chihuahua hundi sem ég mun kalla Brúsa, bleikri dragt og lita hárið ljóst. Þá lendi ég örugglega í einhverju spennandi.

Ef einhver hefur áhuga á félagsskap mínum í kvöld má hringja í mig.

Toyota Corolla!!!!!!!

Tue, 09 Jan 2007 18:22:53 GMT

Við fjölskyldan eigum Volvo S40 og Nissan X-Trail, báðir árgerð '06. Þar áður áttum við Subaro Legacy '00 og Mitsubishi Lancer '92, einhvern hvítan bíl, Ford eða eitthvað út í Svíþjóð og þar áður, þegar ég var pínuponsulítil, ók pabbi um á voldugum Thunderbird. Þess vegna finnst mér þetta alveg óborganlega fyndið að síminn hjá pabba hefur ekki stoppað í allan dag af einhverju liði sem vill kaupa af honum Toyota Corolla (Rollu). Ég heimtaði að fá að svara í símann síðustu tvö skiptin því mér fannst þetta svo einstaklega skemmtilegt(ég veit, líf mitt er ekki mjög spennandi í augnablikinu). Í fyrra skiptið talaði ég við einhvern útlending sem talaði ensku með sterkum pólskum hreim og í seinna skiptið við unglingsstrák. Ég krafði piltinn um upplýsingar og hann gaf mér þær.

Í Fréttablaðinu í dag er þessi auglýsing undir bílar á verðinu 0-250 þúsund: Toyota Corolla, árgerð '95. Vel með farinn, sjálfskipt, air condition. Meðfylgjandi mynd af fremur ljótum bíl og símanúmer karls föður míns. (ég ætla ekki að setja út á það hryllilega íslenska mál sem auglýsingin er á. Air condition!!! Toyotan í tveimur kynjum í sömu sentingunni. OK, Evs....ég þegi....).

Annað hvort er einhver grínari að stríða pabba mínum eða þá að prentvilla hefur orðið hjá Fréttablaðinu og eigandi Toyotunnar situr sár heima hjá sér og sér fram á að selja bílinn aldrei.

Það þarf lítið til að gleðja mig, ekki satt?

50 atriði

Fri, 05 Jan 2007 18:28:34 GMT

Ég fékk samtals 2 kvartanir um að síðasta færsla hefði verið LEIÐINLEG svo ég ætla að gera nýja. Veit ekki um hvað hún ætti að vera svo ég ætla að gera svona lame "50 atriði um mig" eins og á svo mörgum öðrum bloggsíðum. Þar sem ég er einstaklega áhugaverð manneskja verður þetta örugglega skemmtilegt.

1. Ég heiti Sigríður Birta Kjartansdóttir, er hins vegar ekki kölluð það nema af kennurum og bankastarfsmönnum. Flestir kalla mig Siggu, Sísu eða Birtu.

2. Ég er tvítug, og verð tuttugu og eins 12. október.

3. Ég var lang yngst af öllum mínum vinkonum þangað til ég kynntist Sigrúnu í október.

4. Aldur er samt afstæður að mínu mati. Það eru ekki árin sem skipta máli, heldur þroskinn. Úh yeah!

5. Ég fór í sex vikna Interrail með bestu vinkonum í heimi í sumar. Frábært ferðalag en samt varð ferðin eiginlega ekki skemmtileg fyrr en þegar ég var komin á mitt ástækra ylhýra Ísland. Þar sem er mjúkt rúm, góður matur, gott loftslag og svo framvegis.

6. Ég útskrifaðist úr FG á þremur og hálfu ári.

7. Núna er ég í HÍ í lögfræði.

8. Það er mjög gaman þar þótt ég sé ekki beint að brillera ennþá. Ætla bara að taka þetta í vor og stend við það.

9. Þegar ég var lítil talaði ég sænsku og íslensku með sænskum hreim. Ég bjó nefnilega í Gautaborg.

10. Ég vann í 11-11 í þrjú ár.

11. Ég er 162 sm á hæð. Ég er samt mjög ánægð með það. og finnst bara kúl að vera lítil.

12. Ég mætti hins vegar vegar léttari en það er bara eitt af verkefnum ársins - grennast.

13. Þegar ég var lítil var ég svo einstaklega súper-dúper ljóshærð (hvíthærð) að þegar ég var úti í útlöndum (utan Íslands) dýrkaði fólk mig og vildi fá að snerta á mér hárið. Meira að segja í Svíþjóð.

14. Núna er ég hins vegar með skollitað hár sem er frekar brúnt heldur en ljóst. Hef samt tekið eftir því að í augum stráka er ég ljóshærð.

15. Ég hef upplifað líf mitt sem fáránlega rómantíska gamanmynd þar sem ég sjálf er Meg Ryan (þið vitið um hvað ég er að tala....)

16. Líf mitt er samt ekkert sérlega rómantískt í augnablikinu og það fyndna er að mér er nákvæmlega sama.

17. Sumar vinkonur mínar telja að ég sé karlmaður against all odds. Bara af því ég er ekki hrifin af súkkulaði, væmni, rómantík og verslunarleiðöngrum.

18. Mér finnst rosalega gaman að sitja á kaffihúsum og spjalla.

19. Mér finnst ekki gaman að keyra bíl með farþega. Það er hins vegar gaman þegar ég er ein.

20. Í Interrail fékk ég tugi moskítóbita. Ég var með ofnæmi fyrir bitunum svo þau urðu ógnarstór, svo þegar þau loksins hurfu fékk ég exem eftir þau.

21. Ég varð brúnust af stelpunum úti (þetta varð ég að skrifa!). Samt ekkert mjög brún. Varð miklu brúnni á Kanarí, besta útlandaferð sem ég hef farið í.

22. Það tekur mig minna en fimm mínútur að gera hárið á mér fínt eftir sturtu.

23. Það tekur mig hins vegar þó nokkuð lengri tíma að vera í sturtunni sjálfri.

24. Ég er viss um að Bretunum í Búdapest fannst við fjórar dálítið scary.

25. A.m.k. fannst Alwyn og James við vera scary. Alwyn viðurkenndi samt fyrir mér að það hefði nú verið hægt að fá verri stalkera.

26. Mér fannst Áramótaskaupið FRÁBÆRT.

27. Mér finnst Tópas og Ópal mjög mjög gott.

28. Síðustu áramót fannst mér og Heiðrúnu Tópas einum of góður.

29. Það er svolítið langt um liðið síðan ég var á föstu.

30. Ég elska KFC. Máltíð 11, tvo maísstöngla í staðinn fyrir frankar og appelsín að drekka.

31. Ég á engan pening í augnablikinu. Jú, mamma var að gefa mér fimmþúsund....

32. Vinkonur mínar segja að ég sé dekruð. Það er lygi.

33. Mér finnst mjög gaman í Sims.

34. Mér finnst hvítvín, GTR Rosemount, óhugnanlega gott.

35. Ekki jafn hrifin af rauðvíni.

36. Ég er ekki drykkfelld, sjaldan og í hófi er mitt mottó.

37. Mig dreymir rosalega oft mjög langa, skýra drauma. Þeir eru samt frekar steiktir, eins og í nótt þar sem ég var uppreisnarmaður í Egyptalandi. Öskraði hluti eins og "Réttarríkið lifir" og söng bandaríska þjóðsönginn. Svo náðist ég og það átti að hengja mig. Kannski ég hefði ekki átt að horfa á aftöku Saddams?

38. Ég er á móti dauðarefsingum. Enginn á rétt á því að svipta annan lífi.

39. Ég ætla að búa á 101 þegar ég verð stærri.

40. Hef samt ekki tök á því núna.

41. Ég er elsta systkinið, og elsta barnabarnið í báðum ættum.

42. Ég á tvo bræður. Þeir verða fimmtán og þrettán í janúar.

43. Þeir eru ágætir, as far as little brothers go.

44. Ég á tvö frændsystkini. Jón og Gunna hahahahaha.....

45. Sumum þykir ég vera heldur mikill stalker. Ég gæti verið svona einkaspæjari í gegnum tölvur.

46. Mig langar rosalega til Kanarí aftur um jól og áramót.

47. Ég nota skóstærð 38, stundum 37. Það gerist mjög mjög oft hjá mér að skórnir eru búnir í minni stærð.

48. Ég hef brotið rúmið mitt tvisvar.

49. Núna er ég með höfuðverk. Aftur.

50. Á eftir er ég að fara og borða + drekka með Helgu, Önnu og Heiðrúnu. Það vantar Gullu bara allt of mikið :cry:

Jibb, vonandi var þetta skemmtilegra.

kominn tíma til

Fri, 05 Jan 2007 00:45:48 GMT

Jæja, jæja, ný færsla :$ Mér dettur ekkert í hug að skrifa. Jú, ég djammaði FEITAST með Heiðrúnu á nýársnótt (gleðilegt ár öllsömul) í partýi hjá einhverjum vini Kiddó, mjög gaman hjá okkur þótt við hefðum tekið nokkrar dramatískar syrpur hahahaha :haha: Útlandapíunum þótti samt mjög gama að heyra frá okkur ekki satt??? HEfði nú viljað hafa ykkur memm en maður fær víst ekki allt sem maður vill :(

Djöfull er mér illt í hausnum akkúratt núna. Ég gæti auðvitað kennt því um að ég sneri við sólarhringnum alveg óvart. Ætla að fara að sofa á eftir og kippa því í lag.